Մարսել Պրուստի հարցաշարը (Questionnaire de Proust) ֆրանսիացի հայտնի գրող և փիլիսոփա Մարսել Պրուստի լրացրած հարցաթերթիկն է:

Պատմություն

XIX դարի վերջին, երբ Պրուստը դեռ պատանի էր, լրացրեց մի հարցաթերթիկ «Մտքերի, զգացմունքների և այլնի գրանցման ալբոմ» անունով, որը պատկանում էր նրա ընկերուհի Անտուանետային՝ Ֆրանսիայի ապագա նախագահ Ֆելիքս Ֆորի դստերը: Այն ժամանակ նմանատիպ հարցաթերթիկները, որոնք ցույց էին տալիս դրանք լրացնող մարդկանց ճաշակները, ձգտումներն ու համոզմունքները, նորաձև էին անգլիական սրահներում և որոշ ժամանակով մոռացված:

Պրուստը իր կյանքի ընթացքում մի քանի անգամ է հարցաթերթիկ լրացրել  և ամեն անգամ էլ՝ ոգևորությամբ: 1924 թ․ գտնվել է իր պատասխաններով ձեռագիր, որը թվագրվում է 1890 թ․: 2003 թ․ մայիսի 27-ին այն աճուրդի ժամանակ վաճառվել է 102,000 եվրոյով:

Մարսել Պրուստը հարցաթերթիկ չի կազմել, հարցաթերթիկները հայտնվել են դեռ նրա ծննդից առաջ, սակայն հենց նրա պատասխաններն են ճանաչվել առավել յուրօրինակ, և այս հարցաթերթիկը պատմության մեջ մնացել է հենց Պրուստի անունով:

Մեզ են հասել Մարսել Պրուստի լրացրած երկու հարցաթերթիկ: Առաջինը թվագրված է 1886թ․, որը գրողը լրացրել է 13 կամ 14 տարեկանում, իսկ երկրորդը՝ 1891թ․ կամ 1892թ․, որը լրացրել է, երբ  19 կամ 20 տարեկան էր:

Հարացաթերթիկ  № 1

Թվագրվում է  1886 թ․ և բաղկացած է  24 հարցից:

Հարցաթերթիկ  № 1                                          13-ամյա Մարսել Պրուստի պատասխանները   
Ո՞ր առաքինություններն եք առավել գնահատում: Նրանք, որոնք չեն սահմանափակվում որևէ աղանդի պատկանելությամբ, այսինքն՝ համամարդկայինները:
Որակներ, որոնք Դուք ամենից շատն եք գնահատում տղամարդու մեջ: Խելք, բարոյականության զգացում:
Որակներ, որոնք Դուք ամենից շատն եք գնահատում կնոջ մեջ: Նրբություն, բնականություն, խելք:
Ո՞րն է Ձեր սիրելի զբաղմունքը: Կարդալ, երազել, զբաղել պոեզիայով, պատմությամբ, թատրոն հաճախել:
Ո՞րն է Ձեր գլխավոր հատկանիշը:
Ի՞նչ է երջանկությունը Ձեզ համար: Ապրել մարդկանց հետ, որոնց սիրում եմ՝ շրջապատված գեղեցիկ բնությամբ, շատ գրքերով և երաժշտությամբ, և մոտ լինել ֆրանսիական թատրոնին:
Ի՞նչ է դժբախտությունը Ձեզ համար: Մորից բաժանված լինելը:
Ո՞րն է Ձեր սիրելի գույնը և ծաղիկը: Ես սիրում եմ բոլոր գույները, իսկ ինչ վերաբերում է ծաղիկներին՝  չգիտեմ:
Եթե ո՛չ Ձեր, ապա ու՞մ կերպարով կցանկանայիք լինել: Քանի որ այս հարցը արդիական չէ, ես կգերադասեի չպատասխանել: Միևնույն ժամանակ չէի հրաժարվի Պլինիոս Կրտսերը լինելուց:
Որտե՞ղ կցանկանայիք ապրել: Իդեալի երկրում, ավելի ճիշտ՝ իմ իդեալի:
Ձեր սիրելի գրողնե՞րը: Ժորժ Սանդ, Օգոստեն Տյուրրի։
Ձեր սիրելի բանաստեղծնե՞րը: Մյուսե։
Ձեր սիրելի նկարիչնե՞րը և կոմպոզիտորնե՞րը: Մեյսոնիե, Մոցարտ, Գունո:
Ո՞ր արատների նկատմամբ եք ամենից շատ ներողամիտ: Հանճարների անձնական կյանքի նկատմամբ:
Որո՞նք են Ձեր սիրելի գրական կերպարները: Այն կերպարները, որոնք վեպերում և լիրիկայում ավելի շուտ արտահայտում են իդեալը, քան թե օրինակ են ծառայում:
Որո՞նք են Ձեր սիրելի կերպարները իրական կյանքում: Ինչ-որ մեկը Սոկրատեսի, Պերիկլեսի, Մուհամմեդի, Մյուսեի, Պլինիոս Կրտսերի և Օգոստեն Տյուրրի մեջտեղում:
Որո՞նք են Ձեր սիրելի հերոսները իրական կյանքում: Սովորական կենսակերպ վարող հանճարեղ կինը:
Որո՞նք են կնոջ՝ Ձեր սիրելի գրական կերպարները: Նրանք, ովքեր ավելին են, քան կին լինելը, բայց չեն կորցնում իրենց կանացիությունը. նուրբ են, բանաստեղծական, մաքուր և բոլոր առումներով գեղեցիկ:
Ո՞րն է Ձեր նախընտրած կերակուրը կամ ըմպելիքը:
Որո՞նք են Ձեր նախընտրած անունները:
Ինչի՞ հանդեպ եք զզվանք զգում: Այն մարդկանց, ովքեր չեն զգում, որ կա բարին, ովքեր անտեսում են սիրո երջանկությունը:
Պատմական ո՞ր անձինք են առաջացնում Ձեր հակակրանքը: 
Ինչպիսի՞ն է Ձեր ներկայիս հոգեվիճակը:
Ո՞րն է Ձեր սիրելի ասացվածքը: Սիրելի ասացվածքն այն է, որը հնարավոր չէ ամփոփել կամ հակիրճ պատմել, քանի որ դրա ամենապարզ արտահայտությունն իրենից ներկայացնում է այն ամենը, ինչը բնության մեջ ամենալավն է, գեղեցիկը և հիանալին:

Հարցաթերթիկ  № 2

Թվագրված է 1891(92) թ․  և բաղկացած է 31 հարցից:

Հարցաթերթիկ  № 2    20-ամյա Մարսել Պրուստի պատասխանները
Ո՞րն է Ձեզ առավել բնորոշող հատկանիշը: Ոչ թե հիացմունքի առարկա ծառայելը, այլ սիրված լինելու, ավելի ճիշտ՝ գուրգուրված և երեսառած լինելու ծարավը:
Որակներ, որոնք Դուք ամենից շատն եք գնահատում տղամարդու մեջ: Տղամարդկանց առաքինությունները, ինչպես նաև անկեղծությունը ընկերության մեջ:
Որակներ, որոնք Դուք ամենից շատն եք գնահատում կնոջ մեջ: Կանացի հմայքը:
Ի՞նչն եք առավել գնահատում Ձեր ընկերների մեջ: Իմ հանդեպ քնքշությունը, չնայած, որ նրանք այնքան նուրբ անձնավորություններ են, որ նրանց քնքշությունը պահպանել է պետք:
Ո՞րն է Ձեր հիմնական թերությունը: Չգիտեմ, «ցանկության» անկարողությունը:
Ո՞րն է Ձեր սիրելի զբաղմունքը: Սիրել:
Ո՞րն է երջանկության Ձեր երազանքը: Ես վախենում եմ, որ այն բավականաչափ վեհ չէ, միևնույն ժամանակ, ես վախենում եմ այն բառերով ոչնչացնելուց:
Ի՞նչն եք համարում ամենամեծ դժբախտությունը: Երբեք մայրիկիս կամ տատիկիս մասին չիմանալը:
Ինչպիսի՞ն կցանկանայիք լինել: Հենց ինքս՝ այնպիսին, ինչպիսին կցանկանային տեսնել ինձ այն մարդիկ, որոնցով ես հիանում եմ:
Ո՞ր երկրում կցանկանայիք ապրել: Այն երկրում, որտեղ իմ ցանկությունները կարծես թե կախարդանքով իրականություն կդառնային, և որտեղ քնքշության զգացումը միշտ փոխադարձ կլիներ:
Ձեր սիրելի գո՞ւյնը: Գեղեցկությունը մեկ գույնի մեջ չէ, այլ նրանց ներդաշնակության:
Ձեր սիրելի ծաղի՞կը: Սիրելի մարդու սիրելի ծաղիկը, իսկ հետո` մնացած բոլորը:
Ձեր սիրած թռչո՞ւնը: Ծիծեռնակ։
Ձեր սիրելի գրողնե՞րը: Այսօր՝ Անատոլ Ֆրանսն ու Պիեռ Լոտին:
Ձեր սիրելի բանաստեղծնե՞րը: Բոդլեր և Ալֆրեդ դը Վինյի:
Սիրելի գրական հերո՞սը: Համլետ։
Սիրելի գրական հերոսուհիննե՞րը: Ֆեդրա, Բերենիկա։
Սիրելի կոմպոզիտորնե՞րը: Բեթհովեն, Վագներ, Շուման:
Սիրելի նկարիչնե՞րը: Լեոնարդո դա Վինչի, Ռեմբրանդ:
Սիրելի կերպարնե՞րը իրական կյանքում: Մսյո Դարլյու, մսյո Բուտրու։
Սիրելի հերոսուհի՞ն պատմության մեջ: Կլեոպատրա:
Սիրելի անուննե՞րը: Յուրաքանչյուր պահին ես ունեմ միայն մեկ սիրելի անուն:
Ի՞նչն եք առավել շատ ատում: Այն վատը, որ կա իմ մեջ:
Պատմական կերպարներ, որոնց Դուք անարգում եք: Ես բավարար գիտելիքներ չունեմ այս հարցին պատասխանելու համար:
Ռազմական պատմության ո՞ր պահն եք առավել գնահատում: Երբ ես գրանցվեցի որպես կամավոր:
Բարեփոխումը, որը Դուք հատկապես բարձր եք գնահատում:
Կարողությունը, որ կցանկանայիք ունենալ: Կամքի ուժ և հիացնելու կարողություն:
Ինչպե՞ս կցանկանայիք մահանալ: Դառնալով ավելի լավը, քան ես կամ հիմա, և սիրված:
Ինչպիսի՞ն է Ձեր  ներկայիս հոգեվիճակը: Ափսոս, որ ես ստիպված էի այդքան երկար մտածել իմ մասին այս բոլոր հարցերին պատասխանելու համար:
Ո՞ր արատների նկատմամբ եք ամենից շատ ներողամիտ: Նրանք, որոնք ինձ հասկանալի են:
Ո՞րն է ձեր նշանաբանը: Ես նախընտրում եմ չբացահայտել, որպեսզի այն ինձ դժբախտություն չբերի:

«Познер» ծրագրի ավարտին հաղորդավար Վլադիմիր Պոզները հյուրին Պրուստի հարցաշարից մի քանի հարց է տալիս:

Բնօրինակի հեղինակ՝ Cultin


Թարգմանիչ՝ Մերի Բաբայան  (Mery Babayan) © Բոլոր իրավունքները պաշտպանված են:

LEAVE A REPLY

Please enter your comment!
Please enter your name here