Վարքագիծը վերահսկելու 4 արագ եղանակ

Լաուրա Ծաբեթը գովելի է համարում խնդիրները նախապես՝ արմատից լուծելու հիմունքներին վերադառնալը:

Բոլոր աշակերտներից մեծ ակնկալիքներ ունենալը արդյունավետ ուսուցման բանալին է:

Սա թերևս առաջին և կարևոր քայլն է, որ այս մասնագիտությունն ընտրող յուրաքանչյուր ուսուցիչ կարող է սովորել: Սա ստանդարտ թեմա է, որին պետք է անդրադառնալ յուրաքանչյուր դասընթացի, թրեյնինգի ժամանակ:

Ամենաարդյունավետն այն ուսուցիչների աշխատանքն է, ովքեր սովորել են երեխաների հետ շփվելու ընթացքում ուշադրություն դարձնել մանրուքներին:

Եթե ուսուցիչները աշակերտներից դասարանում լավ պահվածքի մեծ սպասումներ չունեն և հաշվի չեն առնում նրանց, ապա ինչպե՞ս կարող են ակնկալել, որ նրանք կհասնեն իրենց ամբողջական պոտենցիալին:

Այնուամենայնիվ, ցածր ակնկալիքների մշակույթը աշակերտներին անգիտակցաբար սովորեցնում է, որ տնօրինությունը հաշվի չի առնում և չի գնահատում իրենց ուսուցումը:

 Վարքագիծ. Հստակություն և հետևողականություն

Հստակ և հետևողական առօրյան՝ ներկառուցված և ամրապնդված առաջին օրվանից, պարտավորեցնում է աշակերտներին վստահաբար իմանալ, որ իրենք ունեն ուսուցիչ, ով գիտի իր անելիքները և ով նպատակ ունի դասարանում ուսուցման համար բարենպաստ և  հնարավորինս լավ միջավայր ապահովել։

Մանրուքների մասին մտածելը կարող է մանրախնդրության  տպավորություն թողնել, բայց նույնիսկ ամենափոքր օրինախախտումների կամ իրավախախտումների հանդեպ վաղ փուլում հատկացված ուշադրությունը  կարող է նվազագույնի հասցնել պահվածքի հետ կապված խնդիրները և առավելագույնի հասցնել սովորելու հնարավորությունները:

Ահա փոքր թվացող 4 խորհուրդ, որոնք կարող են մեծ փոփոխություններ առաջ բերել  և օգնել դասարանում մեծ ակնկալիքների մշակույթի ստեղծմանը:

1.Գրիչները ցած

Գուցե տարօրինակ թվա, բայց առաջին իսկ օրվանից աշակերտներին սա սովորեցնելը և դրան հետևելը ազդանշան է, որ ուսուցիչը լավ գիտի իր անելիքները:

Պարզ, քաղաքավարի հրամանը՝ «Գրիչները ցած, շնորհակալություն», որն ասվում է, երբ  ուսուցիչը սկսում է խոսել, և կրկնվում է ամեն անգամ, երբ ցրված վիճակ է տիրում (թակել, նետել, գրիչը ջանասիրաբար մասերի բաժանել` նորից վերականգնելու մտադրությամբ և այլն), այն է, ինչ անհրաժեշտ է:

Աշակերտները չպետք է իմանան դրա կարևորության մասին: Նրանցից կարող է 5 կամ 6 դաս պահանջվել, որպեսզի հասկանան, որ նրանք չպետք է ձեռք տան գրիչներին և պետք է լսեն ուսուցչին: Արժե սա նախապես ուսումնասիրել:

2․Սկսել նորից

Ամենալավ խորհուրդը այն ուսուցիչներին, որոնց շարունակ ընդհատում են, երբ  նրանք խոսում են, կրկին սկսելն է: Սկսել նորից՝ ամեն անգամ ընդհատվելուց հետո: Ամեն անգամ:

Սովորողների մեծ մասն ընդհատում է ոչ դիտավորյալ` կա՛մ հուզմունքից, չափից դուրս վստահ լինելուց, կա՛մ էլ որովհետև սահմանները նրանց համար պարզ չեն: (Որոշ աշակերտներ խանգարում են, քանի որ ցանկանում են ընդհատել դասը. այդ դեպքում նրանք պետք է դասից հեռացվեն կամ պատժվեն):

Եթե ամեն անգամ ընդհատվելուց հետո նորից սկսես, աշակերտներն անուղղակի կերպով կհասկանան, որ ուսուցիչներին պետք է լսել: Այն նաև ամրապնդում է ուսուցչի ասածի կարևորությունը. եթե ուսուցիչները ցանկանում են կրկնել դա, ուրեմն այն կարևոր է իրենց ուսուցման համար:

Ի՞նչ հետևություններ պետք է անել, եթե ուսուցիչները սկսեն նույն նախադասությունը 5-րդ անգամ փչացած ձայնագրության նման հնչեցնել: Մանրուքներին ուշադրություն դարձնելը ավելի քիչ խնդիրների կտանի:

3․Մարտահրավեր նետել աննշան անկարգապահությանը

Բոլոր աշակերտները պետք է լավ պահվածք ցուցաբերեն, բոլոր ուսուցիչները պետք է դա ակնկալեն, և այն պետք է մշտական բնույթ կրի: Սա նշանակում է, որ վարվելակերպի չնչին խախտումները մտածված կերպով անտեսելը տարբերակ չէ: Վերջիվերջո, եթե աշակերտները խախտում են դպրոցի կանոնները թեկուզ չնչին կերպով, միևնույն է, պետք է հետևել դպրոցական վարքագծի քաղաքականությանը: Օրինակ՝ խոսակցական անպարկեշտ լեզուն անտեսելը, «չարաճճի» երեխային մի կողմում պահելը խոսում է թուլության մասին: Եթե սխալի հնարավորություն կա, աշակերտները կնկատեն դա և կօգտագործեն ուսուցիչների դեմ` պոտենցիալ կերպով հանգեցնելով ավելի մեծ խնդիրների:

Ուսուցիչները պետք է զգոն և հետևողական լինեն փոքր օրինախախտումները պատժելիս: Վարքագծի քաղաքականությանը հետևելը նշանակում է, որ աշակերտները գիտեն, թե ինչին պետք է սպասել, երբ սխալ են գործում։ Սա  օգնում է դասարանում վարքագծի «ստատուս քվո» չդառնալուն: Հարկ եղած դեպքում այն հեշտացնում է ծրագիրը համակարգողների կամ ծնողների հետ քննարկումները:

4․Մաքուր պահել դասարանը

Ուսուցիչները պետք է հիշեն, որ  դասարանները ուսուցման համար նախատեսված տարածքներ են, ոչ թե դեռահասների հավաքատեղի: Առաջին օրվանից աշակերտներին պետք է հասկացնել, որ դասարանը նրանց տարածքն է, և այն պետք է հարգեն ու մաքուր պահեն։

Մաքուր դասարանում դասն ավելի արդյունավետ է. ավելի քիչ գրքեր, գրիչներ և հանձնարարություններ կկորչեն, հետևաբար ավելի քիչ կընդհատվի դասը: Այս հարցի շուրջ արժե նախօրոք մտածել:

Ուսուցիչները պետք է աշակերտներին ցույց տան, թե որտեղ են պահվում գրքերը, ինչպես են դասավորված սեղաններն ու աթոռները և հասկացնեն, որ ոչ թե ուսուցչի, այլ նրանց պարտականությունն է դրանք պահել այնպես, ինչպես կան:

Եթե հնարավոր է, աշակերտների ընդմիջումը և ճաշը կազմակերպեք դասարանից դուրս, որպեսզի վստահ լինեք, որ դասարանը չի կեղտոտվի:

Հիշե՛ք՝ մանրուքներին  ուշադրություն դարձնելը կարող է աննշան թվալ, բայց աշակերտների այն գիտակցումը, որ ուսուցիչներն ի սկզբանե իրենցից մեծ ակնկալիքներ ունեն, հիմք կդնի առավել լավ վարքագծի և հետագայում ուսուցման համար ավելի առողջ միջավայրի:


Արագ ընթերցանության համար` 6 խորհուրդ  դպրոցում վարքագիծը բարելավելու համար 

Լսելու համար՝ Վարգաքիծ. Խրախուսանքները ճիշտ կիրառելու արվեստը

Ցանկանու՞մ եք իմանալ ավելին՝ Ինչպես վարել սովորելը ինձ դարձրեց ավելի լավ ուսուցիչ


Բնօրինակի հեղինակ՝ Laura Tsabet,Tes


Թարգմանիչ՝ Լիաննա Սարգսյան (Lianna Sargsyan) © Բոլոր իրավունքները պաշտպանված են:

LEAVE A REPLY

Please enter your comment!
Please enter your name here