Տնտեսական և առևտրի անկումը ամիսների ընթացքում ի չիք է դարձնում Գերմանիայում և Ֆրանսիայում տարիների տնտեսական աճը։

Հունիսի 24-ին հրապարակված կանխատեսումների համաձայն՝ ղեկավար մարմինները նախազգուշացնում են, որ կորոնավիրուսային ակնկալվող ճգնաժամն ընդամենը մի քանի ամսում ի չիք կդարձնի Գերմանիայի և Ֆրանսիայի տնտեսությունների՝ համաշխարհային առևտրում տարիների կատարած աշխատանքը:

Գերմանիայի տնտեսական հետազոտությունների առաջատար ինստիտուտների տվյալներով առաջիկա երեք ամիսների ընթացքում՝ մինչև հունիս, գերմանական տնտեսությունը անկում կապրի մոտ 10 տոկոսով: 1970 թվականի եռամսյակային ազգային հաշիվները վարելուց ի վեր սա ամենակտրուկ անկումն է, ինչը կրկնակի ավել է, քան 2008 թվականի ֆինանսական ճգնաժամի ամենամեծ անկման ցուցանիշը:

Ֆրանսիայի բանկը չորեքշաբթի օրը նախազգուշացրեց, որ համաճարակի տարածումը զսպելու համար յուրաքանչյուր երկու շաբաթը մեկ տնտեսության լայն հատվածների գործունեության դադարեցումը 1,5%-ով դանդաղեցնում է ՀՆԱ աճի տեմպը: Կենտրոնական բանկը հայտնել է, որ ավելի քան երեք շաբաթ տևած դադարից հետո Ֆրանսիայի տնտեսության մեջ արտադրությունն ամենաարագ տեմպերով անկումն է ապրել Երկրորդ աշխարհամարտից ի վեր՝ կանխատեսելով, որ համախառն ներքին արդյունքը տարվա առաջին երեք ամիսներին նվազել է 6 տոկոսով:

Չորեքշաբթի օրը ՏՀԶԿ հրապարակած տվյալները ցույց տվեցին կորոնավիրուսի հարուցած ցնցումների մեծությունն ու արագությունը գլոբալ տնտեսության վրա․ դա գրանցված ամենամեծ ազդանշանն էր այն մասին, որ ամենամեծ տնտեսությունները գտնվում են անկման մեջ:

Փարիզյան կազմակերպությունը նշում է, որ իր բաղադրյալ առաջատար ցուցանիշների ինդեքսը՝ նախատեսված տնտեսական ցիկլի շրջադարձային պահերը որոշելու համար, խոշոր տնտեսությունների մեծ մասում գրանցել է մարտ ամսվա ամենամեծ անկումը՝ արտացոլելով սահմանափակող միջոցառումների ուղղակի ազդեցությունը արտադրության, սպառման և ապագայի հանդեպ վստահության վրա:

Միևնույն ժամանակ Առևտրի համաշխարհային կազմակերպության կանխատեսումներով սպասվում է, որ ֆինանսական ճգնաժամի համեմատ համաշխարհային առևտուրը կնվազի ավելի մեծ տեմպերով: ԱՀԿ-ն կանխատեսում է նաև համաշխարհային ապրանքատեսակների առևտրի անկում 32 տոկոսով՝ կապված «Covid-19»-ի ճգնաժամով, ինչը 2009թ. 12 տոկոսի համեմատ շատ ավելի արագ անկում է:

-Այս թվերը սարսափելի են. դրանից խուսափել հնարավոր չէ,-ասում է կազմակերպության գլխավոր տնօրեն Ռոբերտո Ազվեդոն: Բացի հենց հիվանդությունից առաջացած տառապանքներից՝ առևտրի և արտադրության անխուսափելի անկումը ցավալի հետևանքներ կունենա նաև տնային տնտեսությունների և ձեռնարկությունների համար:

Այդուհանդերձ ՏՀԶԿ-ն նախազգուշացրեց, որ արգելափակման միջոցառումների տևողության անորոշության պատճառով չորեքշաբթի օրվա ներկայացված տվյալները կարող են արտացոլել ոչ թե այն, թե որքան երկար կամ որքանով բացասական կլինի տնտեսական գործունեության անկումը, այլ միայն ստեղծված ընթացիկ իրավիճակը:

Կորոնավիրուսով պայմանավորված սահմանափակումները սառեցրել են բազմաթիվ բիզնեսների գործունեությունը և մարդկանց մեծամասնությանը ստիպել են մնալ տանը, ինչը Եվրոպայի առաջատար տնտեսություններին տանում է դեպի անկում:

Չորեքշաբթի օրը Շվեյցարիայի կառավարությունը նախազգուշացրեց, որ վատթարագույն դեպքում այս տարի կորոնավիրուսային ճգնաժամի արդյունքում իր տնտեսությունը 10 տոկոսով անկում կապրի, ինչը 1980 թվականից ի վեր կլինի ամենամեծը: Կառավարությունը հայտարարել է, որ ավելի արագ լինելու և ազգային արգելափակումները մինչև մայիս ավարտվելու դեպքում այս տարի տնտեսությունը կունենա 7,1 տոկոսի անկում:

Բեռլինի, Փարիզի և եվրոպական այլ մայրաքաղաքների կառավարությունները միլիարդավոր եվրոների լայնածավալ ծրագրեր են նախաձեռնել՝ կապված անկումից տուժած գործարարներին և աշխատողներին աջակցելու հետ:

-Մենք այժմ հսկայական հարկաբյուջետային խթանող քաղաքականություն ենք իրականացնում Եվրոպայում, քանի որ ՀՆԱ-ն նվազում է, և եկամուտները կայունանում են,-ասում է Փարիզի Sciences Po-ի տնտեսագիտության պրոֆեսոր Ֆիլիպ Մարտինը: Այժմ այդ եկամուտները պահպանվում են, ուստի Գերմանիայում, Ֆրանսիայում, Իսպանիայում խնայողությունների տոկոսադրույքն արագորեն աճում է: Հարցն այն է, թե մենք ինչ պետք է անենք դրա հետ ճգնաժամից հետո: Դա շատ անորոշ է:

Կենտրոնական բանկից հայտնեցին, որ մարտ ամսվա յուրաքանչյուր շաբաթ Ֆրանսիայում բիզնեսի ակտիվությունը նվազել է մոտ մեկ-երրորդով: Սպասվում է, որ Ֆրանսիայի տնտեսության անկումը կլինի նույնը, ինչ 1968-ի երկրորդ եռամսյակում, երբ համախառն ներքին արդյունքը նվազեց 5,3 տոկոսով ուսանողների կողմից առաջնորդվող բողոքական շարժման ազդեցության պատճառով:

Երկրի առաջատար տնտեսական հինգ հաստատությունների կողմից կատարված հետազոտության արդյունքներով (կառավարության համար տարեկան 2 անգամ անցկացվում են) նախատեսվում է, որ Գերմանիայի տնտեսությունը առաջին եռամսյակում անկում կապրի 1,9, իսկ տարվա ընթացքում՝ 4,2 տոկոսով: Նույն կանխատեսմամբ տնտեսությունը կվերականգնվի հաջորդ տարի` ապահովելով 5,8 տոկոս աճ:

-Մինչ այժմ գերմանական տնտեսության «դրական» մասը եղել է ծառայությունների ոլորտը, բայց ակնհայտ է, որ այս ճգնաժամն ավելի ուժեղ ազդեցություն կունենա ծառայությունների ոլորտի, քան արտադրության վրա, քանի որ արդյունաբերական արտադրության գործընթացը տևում է ավելի երկար, քան մանրածախ առևտրի կամ ծառայություններինը, որոնք հիմնականում դադարել են,-նշեց Ֆրանկֆուրտի ING-ի տնտեսագետ Կարսեն Բռզեսկինը:

Ակնկալվում է, որ ճգնաժամը Գերմանիայում գործազուրկների թիվը 236,000-ով կավելացնի՝ հասցնելով մինչև 2,5 միլիոնի, ինչը կբարձրացնի գործազրկությունը ռեկորդային ցածր մակարդակից՝ 5-ից մինչև 5,5 տոկոս: Դա եվրագոտու շատ այլ երկրներում գործազրկության մակարդակի ցուցանիշից ցածր կմնա. վերջերս Միությունում գործազրկության ընդհանուր մակարդակը հասել է 12-ամյա նվազագույնի՝ 7,4 տոկոսի:

-Գերմանիան լավ դիրքում է տնտեսական ճգնաճամը հաղթահարելու համար և կարող է միջնաժամկետ հեռանկարում հասնել այն տնտեսական մակարդակին, որին հնարավոր կլիներ հասնել առանց ճգնաժամի,-ասում է Տիմո Վոլմերսշուսերը՝ Մյունխենում «Իֆո ինստիտուտ»-ի կանխատեսումների ղեկավարը:

Հինգ հաստատությունները կանխատեսում են, որ Բեռլինի արձագանքը ճգնաժամին երկրին կհասցնի դեպի բյուջեի դեֆիցիտի, ինչը առաջինն է վերջին մի քանի տարվա ընթացքում և հավասար է ՀՆԱ-ի 4,7 տոկոսի չափով: Սա կավելացնի պետական ​​պարտքը ՀՆԱ-ի գրեթե 60- 70 տոկոսով:

Ե՛վ Գերմանիան, և՛ Ֆրանսիան կորոնավիրուսային ճգնաժամի մեջ մտան արդեն իսկ թուլացած տնտեսական պայմաններով: Անցած տարի Գերմանիան հազիվ խուսափեց անկումներից, քանի որ նրա արտադրության վրա ազդել էր ԱՄՆ-Չինաստան առևտրային պատերազմը, իսկ Ֆրանսիայի տնտեսությունը անկում էր գրանցել անցած տարվա վերջին քառորդում՝ գործադուլների և բողոքի ցույցերի արդյունքում:

Բնօրինակի հեղինակ՝ Financial Times, Martin Arnold և David Keohane


Թարգմանիչ՝ Հակոբ Հակոբյան (Hakob Hakobyan) © Բոլոր իրավունքները պաշտպանված են:

LEAVE A REPLY

Please enter your comment!
Please enter your name here