Այսօր՝ օգոստոսի 15-ին, «Ինլայթ»-ի վերլուծաբան, Խորհրդի անդամ, 44-օրյա պատերազմի հերոս, մասնագիտությամբ տնտեսագետ Հակոբ Հակոբյանի 29-ամյա տարեդարձն է: Հակոբի լույս հիշատակին նվիրված՝ լույս է տեսել նրա «Վերլուծություններ և հոդվածներ» երկլեզու ժողովածուն՝ հայերեն և անգլերեն:
Հրատարակության մեջ զետեղված են Հակոբի տնտեսագիտական վերլուծությունները, մասնագիտական թարգմանություններն ու հոդվածները՝ հրապարակված «Ինլայթ»-ի կայքէջում 2017-2020 թթ. ժամանակահատվածում:
***
Հակոբը համակարգում էր «Ինլայթ»-ի տնտեսագիտական բաժինը, պրակտիկայի և մենթորության ծրագրերը, հեղինակում, թարգմանում և խմբագրում մասնագիտական տարաբնույթ հոդվածներ:
2013 թ.-ին ավարտել է Հայաստանի պետական տնտեսագիտական համալսարանի (ՀՊՏՀ) Մարքեթինգի և բիզնեսի կազմակերպման ֆակուլտետի Բիզնեսի կազմակերպման բաժինը՝ ստանալով կոմերցիայի բակալավրի կոչում:
2013-2015 թթ. ծառայել է ՀՀ Զինված ուժերում:
2015 թ.-ին ՀՊՏՀ-ի մագիստրոսական ծրագրի շրջանակում համալսարանական ErasmusPlus փոխանակման ծրագրով սովորել է Էստոնիայի Տարտուի համալսարանի Հանրային կառավարման ֆակուլտետում: 2017 թ.-ին ավարտել է ՀՊՏՀ-ի Պետական և մունիցիպալ կառավարման մագիստրատուրան` ստանալով կառավարման մագիստրոսի կոչում:
2017 թ.-ից աշխատել է ՀՀ Կենտրոնական բանկի Դրամաշրջանառության վարչության Արժույթի թողարկման բաժնում՝ որպես վերլուծաբան:
Տվյալագետ դառնալու հավակնոտ նկրտումներով 2018 թ.-ին ընդունվել է Հայաստանի ամերիկյան համալսարան, որտեղ սովորում էր տնտեսագիտության մագիստրոսական ծրագրով՝ նախքան ռազմի դաշտում հերոսաբար զոհվելը:
***
Հակոբը զոհվել է Կուբաթլուի շրջանում 2020 թ. հոկտեմբերի 26-ին: Հուղարկավորվել է հայրենի Սայաթ-Նովա գյուղում` Արարատի մարզում:
Համաձայն ՀՀ նախագահի 2020թ.-ի նոյեմբերի 11-ի «Մարտական ծառայության մեդալով պարգևատրելու մասին» ՆՀ-296-Ա հրամանագրի` հայրենիքի սահմանները պաշտպանելիս ցուցաբերած խիզախության և անմնացորդ նվիրումի համար հետմահու պարգևատրվել է «Մարտական ծառայության» մեդալով:
***
Հակոբի մասին ջերմ հիշողություններն ու նրա լույս հիշատակը մեր հոգում և սրտում են ~
Նա բոլորիս անասելի կարոտ է թողել՝ պարկեշտության, նվիրվածության, վճռականության և հայրենասիրության մարմնացում և օրինակ լինելով մեզ համար: Իր հերոսությամբ սթափեցրել ու պարտավորեցրել է բոլորիս:
Հավերժ ~
Գիրքը ձեռք բերելու համար կարող եք կապ հաստատել մեզ հետ +374 43 097051 հեռախոսահամարով կամ info@enlightngo.org էլ. հասցեով, ինչպես նաև՝ գրելով մեր ֆեյսբուքյան էջին:
Գրքի թվանշային տարբերակը կարող եք բեռնել հղմամբ:
EconoMix նախագիծ՝ նվիրված Հակոբի հիշատակին:
