Ստորև ներկայացնում ենք սեպտեմբերի 27-ից սկսված ադրբեջանական զինված ուժերի կողմից Լեռնային Ղարաբաղի Հանրապետության ուղղությամբ հրադադարի խախտումներն ու հետագա զարգացումներն ըստ ժամանակագրության՝ հայերեն, անգլերեն, ռուսերեն, ֆրանսերեն և գերմաներեն թարգմանություններով:
29 հոկտեմբերի, 2020թ. 23:13
ԱՀ ՄԻՊ Արտակ Բեգլարյան
Հոկտեմբերի 29-ին Ադրբեջանը շարունակաբար թիրախավորվել են Արցախի խաղաղ բնակավայրերը, այդ թվում՝ մայրաքաղաք Ստեփանակերտը:
Մայրաքաղաքին հասցված հրթիռային հարվածների հետևանքով վիրավորվել է երկու քաղաքացի: Ավերվել կամ վնասվել են բնակելի տներ և մեքենաներ, ինչպես նաև կենսական նշանակության քաղաքացիական ենթակառուցվածքներ: Շուշի քաղաքի հրթիռակոծության հետևանքով քաղաքի բնակելի հատվածներին և քաղաքացիական օբյեկտներին հասցվել է նյութական մեծ վնաս: Սղնախ գյուղում երկու քաղաքացիական անձ է վիրավորվել:
29 հոկտեմբերի, 2020թ. 18:01
Ռազմական ավիացիա է կիրառվել նաև Ասկերան և Մարտունի քաղաքներում։ Տուժածներ այստեղ չկան։ Ավիահարվածներից քաղաքներում և հարակից բնակավայրերում ավերվածությունները շատ են։
29 հոկտեմբերի, 2020թ. 14:53
ՀՀ ՊՆ մամուլի քարտուղար Շուշան Ստեփանյան
ՀՀ ԶՈւ երկու Սու-25 ինքնաթիռի ոչնչացման մասին ադրբեջանական կողմի հայտարարությունը ապատեղեկատվություն է։
29 հոկտեմբերի, 2020թ. 14:38
ՀՀ ՊՆ մամուլի քարտուղար Շուշան Ստեփանյան
Հայկական կողմին են փոխանցվել ռազմական գործողությունների ընթացքում զոհված 29 հայ զինծառայողների մարմինները:
29 հոկտեմբերի, 2020թ. 12:05
Մարտակերտ քաղաքի վրա թշնամին կիրառել է ռազմական ավիացիա։ Կան ավերածություններ։ Քաղաքացիական բնակչության շրջանում տուժածներ չկան։
29 հոկտեմբերի, 2020թ. 11:56
Օդային տագնապ է Ստեփանակերտում, Ասկերանում, Մարտունիում և Մարտակերտում։
29 հոկտեմբերի, 2020թ. 09:21
Առավոտյան ժամը 8-ին Ստեփանակերտում հայտարարվեց օդային տագնապ: 08:03-ին լսվեց հրթիռի հերթական հարվածի ձայնը: Մայրաքաղաքի ծայրամասային փողոցներից մեկում ադրբեջանական ուժերը կիրառել են «Սմերչ» տիպի ռեակտիվ համակարգ: Ավերվել է մեկ բնակելի տուն, հարվածից ամբողջությամբ փլվել է հարակից շինությունը և վնասվել մեկ ավտոմեքենա: Տան տերը և հարևանը վիրավորվել են և տեղափոխվել բուժհաստատություն:
29 հոկտեմբերի, 2020թ. 09:11
Արցախի նախագահի մամուլի խոսնակ Վահրամ Պողոսյան
Ռազմական գործողություններն առաջնագծի տարբեր ուղղություններով ինտենսիվ կերպով շարունակվում են։ Պաշտպանության բանակը, հատկապես, թեժ մարտեր է մղում Ասկերանի շրջանի Ավետարանոց, Սղնախ և Ակնաղբյուր հատվածում։ Թշնամին ունի կենդանի ուժի մեծ կորուստներ։
29 հոկտեմբերի, 2020թ. 09:03
Ստեփանակերտում րոպեներմ առաջ ավարտվեց տագնապի ազդանշանը։ Ադրբեջանն Արցախի մայրաքաղաքի վրա ևս 5 հրթիռ արձակեց։ Նախնական տվյալներով տուժածներ ու ավերածություններ չկան։
29 հոկտեմբերի, 2020թ. 03:04
Ստեփանակերտում րոպեներ առաջ ավարտվեց տագնապի ազդանշանը։ Ադրբեջանն Արցախի մայրաքաղաքի վրա ևս 5 հրթիռ արձակեց։ Նախնական տվյալներով տուժածներ ու ավերածություններ չկան։
29 հոկտեմբերի, 2020թ. 02:31
Նախնական տվյալներով՝ վերջին րոպեներին Ստեփանակերտը 5 անգամ հրթիռակոծվեց։