2020 թվականի մեկնարկն «Ինլայթ»-ում տրվեց ամենամյա համագումարով, որի ընթացքում տեղի ունեցավ ամենակարևոր իրադարձություններից մեկը՝ կանոնադրական մարմինների ընտրությունը (խորհուրդ, վերաքննիչ և վերստուգող)։ Հատկանշական է նաև, որ սկիզբ դրվեց վերլուծական ֆորումի նոր եթերաշրջանին. տարվա անդրանիկ հանդիպումը հունվարի 26-ին էր:
Այս ընթացքում հրապարակվեցին Վերլուծական ֆորումի 11, Ինլայթ համալսարանի 3, Անցյալի ներկայության և GreEnlight-ի 1-ական նյութ:
Արդեն հաջորդ ամիս՝ փետրվարի 16-ին, երբ կայացավ վերլուծական ֆորումի հերթական հանդիպումը, մեկնարկ տրվեց տնտեսագիտական ենթաբաժնի աշխատանքներին:
Նշենք նաև, որ Նիկոլայ Հարությունյանի և Նաիրա Սարդարյանի գլխավորությամբ վերսկսվեցին դրամաշնորհային ծրագրերի դիմումները:
Ամսվա ընթացքում հրապարակվեցին հարցազրույցներ, Վերլուծական ֆորումի 9, Ինլայթ համալսարանի 1 և Անցյալի ներկայության 2 նյութ:
Մարտ ամիսն այս տարի կարևորվեց իր «անակնկալներով»․ «Ինլայթ»-ն ամբողջապես անցում կատարեց հեռավար աշխատանքային ռեժիմի` պայմանավորված կորոնավիրուսային վարակով:
Մարտի 18-ին հեռավար եղանակով կայացավ աշխատակազմի հանդիպումը, որի ընթացքում ամփոփվեցին հայտադիմումների գործընթացը և արդյունքները, քննարկվեցին նոր համագործակցությունները և առաջիկա պրակտիկաների կազմակերպչական հարցերը, մշակվեցին բաժինների որակավորումները:
Վերլուծական ֆորումի հանդիպումը կայացավ մարտի 21-ին: Օրակարգում ներառված նյութերի հեղինակներից էր Գևորգ Գասպարյանը։ Նրա թեկնածության շրջանն ավարտվեց, և քվերարկության արդյունքում Գևորգը համալրեց վերլուծաբանների շարքերը:
Մարտի 28-ին կայացավ մեդիա բաժնի հանդիպումը, որի ընթացքում ամփոփվեցին բաժնի ընթացիկ աշխատանքները, բաշխվեցին նոր առաջադրանքները, փոխանակվեցին կարծիքներ և առաջարկներ, տրվեց հետաքրքիր և ինտելեկտուալ քուիզերի նոր շարքի մեկնարկը:
Խմբագիրների բաժնի հանդիպումը կայացավ մարտի 29-ին. ամփոփվեցին բաժնի աշխատանքները, քննարկվեցին մի շարք խմբագրական հարցեր, աշխատանքային նոր գործիքներ, կարծիքներ և առաջարկներ, ինչպես նաև Ոսկեղենիկի նոր թեմաները:
Մարտին հրապարակվեցին Վերլուծական ֆորումի 9, Անցյալի ներկայության 2, #GreEnlight-ի 2 և Ոսկեղենիկի 1 նյութ, վերամեկնարկվեց #EnlightTalks-ը։
Ապրիլն «Ինլայթ»-ում նշանավորվեց Slack համակարգի վերջնական ներդրմամբ. կազմակերպության հաղորդակցման ողջ գործընթացն այժմ ամբողջապես տեղի է ունենում հենց այս հարթակում:
Ապրիլի 5-ին կայացավ թարգմանիչների բաժնի հերթական հանդիպումը, որի ընթացքում քննարկվեց բաժնի աշխատակարգը, ամփոփվեցին աշխատանքների որակավորման արդյունքները, տեղի ունեցավ քննարկում թարգմանվող նյութերի ընտրության և բովանդակության վերաբերյալ:
Այս ամիսը նշանավոր էր նաև նրանով, որ կազմակերպվեց թարգմանիչների և խմբագիրների համար նախատեսված պրակտիկա․ թարգմանչական 3-ամսյա պրակտիկային ներգրավվեցին 9 մասնակից:
Ապրիլի 2-ին, 12-ին և 25-ին վերլուծական ֆորումի հանդիպումներ կայացան, որոնց արդյունքում վերլուծական ֆորումը համալրվեց մասնագիտությամբ տնտեսագետ երեք վերլուծաբաններով:
Ամսվա ընթացքում հրապարակվեց վերլուծական ֆորումի 14, Ինլայթ համալսարանի 4 և անցյալի ներկայության 2 նյութ:
Մայիսին անցում կատարվեց JIRA-ին: Վերջինս աշխատանքների համակարգման ծրագիր է, որը կիրառվում է կազմակերպության նախագահության, խորհրդի, բաժինների ղեկավարների և առանձին նախագծերի համակարգման համար:
Jira-ն թույլ է տալիս իրականացնել աշխատանքների հստակ պլանավորում, հետևում և մոնիթորինգի իրականացում: Վերջինս մեր ներկազմակերպչական գործունեությունը դարձնում է առավել թափանցիկ և, որ ամենակարևորն է, խիստ հաշվետու և հետևողական:
Ուրախությամբ նշենք, որ «Ինլայթ»-ը համագործակցություն է սկսել «Վիքիմեդիա Հայաստան»-ի հետ՝ ներգրավելով ինչպես խմբագիրների ամբողջ կազմին, այնպես էլ կազմակերպության այլ անդամներին։ Օգտագործելով հեռահաղորդակցման միջոցները՝ իրականացվեցին դասընթացներ, որոնց ընթացքում կազմակերպության անդամները ծանոթացան Վիքինյութերի ստեղծման ու խմբագրման գործիքակազմին: Արդյունքում թարգմանվում և ստեղծվում են նոր հետաքրքիր ու տարաբնույթ հոդվածներ՝ հասանելի դառնալով նաև հայալեզու լսարանին:
Այս ընթացքում «Ինլայթի» լրագրող Ինգա Շիրակյանը զբաղված էր հարցազրույցներ անցկացնելով կազմակերպության թարգմանիչների հետ:
«Ինլայթը» նաև սկսեց համագործակցել/թղթակցել Strategeast-ի հետ:
Մայիսին հրապարակվեց Վերլուծական ֆորումի 11, Ինլայթ համալսարանի 3, Անցյալի ներկայության 1, GreEnlight-ի 1 և Ոսկեղենիկի 4 նյութ:
Դե իսկ արդեն հունիսի 6-ին «Ինլայթը» հեռավար եղանակով նշեց 4(12) ամյակը, տրվեց վերլուծական 3-ամսյա պրակտիկայի մեկնարկը: «Ինլայթը» սկսեց համագործակցել միջազգային կապերի շվեդական ասոցիացիայի (UFS) հետ:
Թվանշանային ձևաչափով հրատարակվեց Կարլ Շմիթի «Զրույց իշխանության և տիրակալի հասանելիության շուրջ» ռադիոէսսեն, որը պատրաստել էին Մերի Բաբայանը, Գայանե Խաչատրյանը, Նունե Մաթևոսյանը, Լիլիթ Խաչատրյանը և Գոռ Մադոյանը:
Հունիսի 15-ին իրականացավ վերլուծական ֆորումի հերթական հանդիպումը: Այս ամսվա ընթացքում հրապարակվեցին Վերլուծական ֆորումի 15, Ինլայթ համալսարանի և GreEnlight-ի 1-ական և Ոսկեղենիկի 4 նյութ:
«Ինլայթի» 2020 թվականի կարգախոսն է` «Սովորի´ր, որ փոխես»:
Հեղինակ` Արամ Սամանյան:
2020 թվականի մայիսից մինչև հունիս հրապարակվել է 107 նյութ (Վերլուծական ֆորում` 69, Անցյալի ներկայություն` 8, Ինլայթ համալսարան` 12, GreEnlight` 5, Ոսկեղենիկ` 13):
Ի՞նչ սպասել:
Գալիք ծրագրերը` նախատեսված մինչև 2021 թվականը
- Որակավորումների / Հետադարձ կապերի անցկացում
- Jira-ում աշխատակիցների նեգրավվածության ընդլայնում
- Կարլ Շմիթի «Զրույց իշխանության և տիրակալի» հասանելիության շուրջ» գրքի տպագրություն
- Մաքս Վեբերի «Գիտությունը իբրև կոչում և մասնագիտություն» աշխատանքի թարգմանության թվանշային հրատարակություն
- «Մասնագիտական կողմնորոշման դասընթացներ մարզերի ավագ դպրոցներում» ծրագրի վերամշակում և շարունակություն
- Կրթության շուրջ LiveTalks` պիլոտային քննարկում
- Law Simplified նախագծի մեկնարկ
- EconoMix նախագծի մեկնարկ
- GreEnlight-ի շարունակականության ապահովում
- Պրակտիկաների 2-րդ սերունդ/հոսք
- Աշխատակազմի ինստիտուցիոնալ կայացում
- Զարգացման բաժնի վերակազմավորում և կայացում
- Կանոնադրական մարմինների՝ Խորհուրդ, Վերաքննիչ, Վերստուգող անդամների թեկնածության առաջադրում / ընտրություններ
- Աշխատանք հանրահռչակման ուղղությամբ. լսարանի ընդլայնում
- Աշխատանքների արդյունավետ իրականացումը կատարվում է երեք փուլով. պլանավորում, իրականացում և մոնիթորինգ:
Գործողությունների պլանավորումը առավել համակարգված է դարձնում ընթացիկ աշխատանքները և թույլ է տալիս հստակ ուրվագծել առաջիկա անելիքները:
Գործողությունների քայլ առ քայլ մշակումը, ժամկետների հստակեցումը և աշխատանքի բաշխումը իրագործման ճանապարհի քայլերն են: Հետևողականությունը և համառությունը բոլոր ծրագրերի, գաղափարների իրագործման նախապայմաններն են:
Մոնիթորինգն իրականացվում է ինչպես ընթացիկ աշխատանքների, նախագծերի պարագայում, այնպես էլ արդեն կատարվածների: Դա թույլ է տալիս ժամանակին վեր հանել հնարավոր խնդիրները, բացթողումները և մշակել լուծումներ:
Համարձակվի´ր մտածել:
Սովորի´ր, որ փոխես: